何雁詩同男友鄭俊弘（Fred）嘅「雁鄭戀」疑受唱片公司打壓，日前何雁詩約好姐妹陳瀅、劉佩玥等友人好尖沙嘴打邊爐，離去時被「嫩版陳智燊」拖實過馬路。(新聞連結： http://bit.ly/2uwTSHo )

加上之前有鎅手傳聞困擾，今日何雁詩到尖沙嘴出席活動，澄清自己冇自殺，問到最近心情如何？佢坦言：「本來ok，但出咗新聞又有壓力。」係咪因為咁要散心，所以日前同朋友食飯玩得好開心，走嘅時候拖晒手？何雁詩表示：「我睇到覺得匪夷所思，嗰個人係識咗好多年嘅中學同學，我之前拍拖嘅都好坦白講咗，唔想因為其他事影響個男仔，唔係拖，係捉住我手臂，任何關係我出街拍拖都唔會拖手。」

有記者即刻提醒佢，上次佢同Fred拖手高調現身機場公開戀情，何雁詩只好話：「唔會有下次。」問到佢同Fred感情有冇變？佢強調：「一直都冇變，只係想低調啲，想有自己空間，我哋關係冇變，只係好努力做緊嘢。」

不過，自從佢哋承認戀情後形象受影響，Fred被傳遭公司雪藏，呢排好似人間蒸發！何雁詩幫男友澄清：「佢之前有拍廣告同MV，呢段時間我哋都有進修自己。」問到兩人係咪都少咗工作？何雁詩坦言：「我其實都係差唔多，一直以嚟唔係好多嘢做，加上身體不適推咗劇，變咗靜啲都係正常，呢個係我選擇。」

會唔會覺得自己拖累男友？何雁詩即刻變得好正經、好嚴肅咁答：「冇得咁樣計，我哋冇咁諗，唔想有任何情緒影響工作，男友o依家好開心，情緒冇問題，日日彈結他。」做完訪問後，何雁詩同記者閒談兩句，有記者笑佢好似「鄭中袖」，何雁詩才回復平日笑樣話：「我係鄭長袖。」

此外，同場嘅王浩信被問到喺後台時，有冇見到何雁詩除褸？王浩信表示：「冇，我今日都着長袖，我哋拍劇成為朋友，知佢最近經歷好多，無論任何嘢都撐佢，知佢呢段時間有壓力。」咁做嘢時有冇見過佢着短袖？王浩信避答：「我冇留意。」問到覺唔覺得何雁詩有情緒困擾？王浩信話：「正常面對咁大壓力，都有少少波動。」