滙漢（214）啱伸手供完股，供股後嘅NAV一樣咁吸引，供股嚟緊星期四出籠前，好收貨。滙漢6月宣布2供1，供股後最新NAV3.9元，連埋旗下泛海（129）近百萬呎土儲同物業嘅資產增值，好保守計數，滙漢NAV可以秤到貼近5蚊，現價（1.8元）折讓去到64%。
同滙漢一樣冇乜交投嘅金朝陽（878），由今年3月起步，就算上星期五大跌市，都翻咗一番。大折讓磚頭股，一樣有資金吼。再講，龍昌（348）1月供完股之後，呢期就一支箭，升咗5、6倍。滙漢供股後，NAV折讓仲係咁吸引，加埋啱先伸完手，貨源齊備，斷估唔係齋坐煲醋，港股牛氣再現，滙漢分分鐘又係龍昌翻版。炒NAV折讓，中線博滙漢好似金朝陽咁翻一番，滙漢要見3.6元，到時，滙漢NAV折讓，仲講緊貼近30%，實情仲有大把向上空間。

汽車股　慶鈴最抵買

慶鈴（1122）最新NAV2.7元，現價（2.11元）相對折讓接近22%。雖則折讓唔係話多，但慶鈴仍然係汽車股當中，唯一仲有NAV折讓嘅企業，買P/B，慶鈴最抵買。
又今年6月，內地證券報傳出，慶鈴計劃回歸A股兼注資重組。祖國股市狂牛，就算慶鈴回歸A股上市，有乜出奇。即係話，慶鈴中、短線有炒發A股概念。呢期市況唔多靚仔，吼實50日線兩蚊水位入市，博慶鈴見NAV，潛在升幅35%。
錢雋