日本女星新垣結衣憑大熱劇《逃跑雖可恥但有用》登上事業高峰，喺日本調查機構Video Research剛公佈嘅「女星好感度」調查，結衣BB微升一級至第一位，係佢首次獲得冠軍。

呢項調查每年會搞兩次，結衣BB去年靠《逃恥》人氣急升獲得第二位，近期佢憑《Code Blue》第三季維持高人氣，喺「女星好感度」調查成為冠軍。至於已退役嘅花滑女神淺田真央同天海祐希就分別排第二、三，隨後分別係綾瀬遙、DREAMS COME TRUE、深田恭子、石原聰美同渡邊直美。至於「男星好感度」調查方面，就由明石家森馬成為冠軍，阿部寬同重量級人妖藝人Matsuko Deluxe就排第二、三位。