「呢件事真係好瘋狂，因為佢提醒你呢盤係大生意。」NBA周四最重磅交易，莫過於公牛將占美畢拿（Jimmy Butler）同今年第16順位新秀柏頓（Justin Patton）送去木狼，換取「入樽王」拿維（Zach LaVine）、去年第5順位新秀鄧恩（Kris Dunn）同今年第7順位新秀馬克根尼（Lauri Markkanen），令唔少「風城」球迷狂呼不捨。得悉交易落實時身處巴黎出席時裝周等活動嘅畢拿，接受《Chicago Sun Times》電話訪問時，就坦言不滿公牛嘅處理手法：「呢件事真係好瘋狂，因為佢提醒你呢盤係大生意。但你唔可以向任何人發飆，我亦冇咁樣做，只係我唔鍾意某啲事情嘅處理手法，但只能如此。」

雖然畢拿向公牛管理層發炮，但佢對球迷就相當不捨，事隔一日喺instagram發表「致芝加哥的信」，同呢個過去6年嘅家說再見：「芝加哥，我實在難以啟齒，因為你們過去6年對我的意義遠超一個家，你們是我的生命！你們視我如兒子擁護我，推動我每一天、每一季做得更好。芝加哥，我愛你，感謝你擁抱一位來自Tomball的小孩成為一份子。前往新家庭、新球會，感恩有一些熟悉面孔！可能是最重要的事，感謝每一位在球隊背後耕耘，卻未得到應有光榮的人！你們都是真正的明星！」