香港呢輪興懷舊，集體回憶有價，所以屋企如果有啲上環德輔道中舊相片、60年代叱咤一時嘅幻彩掛牆電鐘等懷舊物品，分分鐘可以拎出嚟拍賣，賺番筆。
普藝拍賣有限公司噚日舉行鴻福堂懷舊收藏品、中國書畫及藝術品拍賣會，當中廣生行嘅廣告畫就賣得最貴，破估價5,000至7,000蚊，以8,740蚊成交，雙妹嘜果然零舍得人鍾意！成交價第二高嘅拍賣品係石灣窯變釉天山放牧陶瓷，賣到7,130蚊。主辦單位話，市民如果有啲保存得幾好嘅懷舊品，歡迎同佢哋傾吓，賣唔出唔會收任何費用。
噚日喺現場參與拍賣嘅超過100人，大部份都係上咗年紀嘅成熟一族，有人仲手持枴杖出席，十分熱情。不過逾200件拍賣品中，有約50件最後無人問津或過唔到底價而要收回。