Asia Miles換機票難，難於上青天。消委會之前都話，有Asia Miles會員投訴早一年訂位都要候補。噚日見到國泰企業事務董事唐偉邦（James），即刻竇娥上身，攔路申冤。
James解釋，航空公司係用電腦系統估算每班航機嘅需求，例如12月23日飛北海道，估計需求好大，所以留畀兌換機票嘅位唔會太多；由於系統好早已預計需求，所以就算一年前訂都可能換唔到機票。

#多畀里數換機會

不過，佢話系統係定時更新，有時可能較接近航班出發日期，系統先發現航班冇之前估計需求咁大，就可能留多啲機位畀會員換票。所以一年前訂唔到，有時近啲就訂到喎，「不過呢啲唔一定㗎」。唓！唔通真係要日日瘋狂mon住咩。
費清又見到，Asia Miles換機票多咗「優越獎勵機票級別」，例如換日本經濟艙機票一般要3萬里，可惜旺季一般好難換到，但如果肯畀多啲里數，例如4萬、甚至9萬，換到嘅機會就大啲，但9萬里可以飛3次日本喇！
另外，國泰研究緊明年開辦新航線，包括直飛西班牙、以色列、北歐。James解釋，因為訂咗嘅空中巴士A350客機（圖）明年2月開始送到，呢款機好輕，所以燃油成本低咗，可以諗啲要飛得遠嘅航線。

費清
＃要生計，也要生活
＃毋忘初衷