當年今日

中環在線:
任影金財神冇人吼 - 李華華

蘋果日報 2013/05/07 00:00


恒生銀行(011)為慶祝80周年,專登喺東莞搵人,將招牌財神製成一個逾六呎高嘅巨型金財神像,呢兩個星期放喺中環總行入面,近大門對住櫃員機嘅位置,任人影相。可惜,暫時佢唔及巨型膠鴨咁受歡迎,好多出入銀行嘅市民好似對佢興趣不大。
金財神像由玻璃纖維製成,外面鋪上金箔,特別嘅係,呢個財神以往通常拎住一個寫住「恭喜發財」嘅揮春,𠵱家變為「生意興隆」。難得恒生冇整個「不准觸摸」嘅牌,華華都手多摸咗幾吓,希望沾到些少財氣。
噚日中午食晏時間現場所見,只有少數出入銀行嘅市民留意到呢個巨型財神,拎起手機同佢影相,好多人望一眼就算,可能趕住食晏。金財神像會放喺總行兩星期,之後幾個月,會搬到恒生其他大型分行做巡迴展覽,中環人想同金財神合照就要快手了。