《逃犯條例》引起極大爭議，政府至今仍然對民間撤回《逃犯條例》修訂、收回6.12暴動定性、撤銷被捕市民檢控、追究警察濫用暴力，以及林鄭下台的五大訴求無動於衷，結果引發不少抗爭行動，其後與警方爆發衝突。徐天佑早前為事件將FB個人專頁的頭像照換上全黑色頭像，表達哀痛，有網民留言挑釁：「奀星做乜轉頭像？」徐天佑簡單又霸氣地回覆：「關你Ｘ事！」

今日凌晨，天佑又在社交平台再為「奀星」出post，他說：「奀星、明星、大星、巨星都係一個大眾幻覺，“Star is an illusion what public call you” Bruce Lee.我十五六歲就入行，當時未知自己想點，不過，我知道我係想做一個演員（Actor），而我又好鍾意音樂，我想做一個音樂人（Artist）。我屋邨出身，想搵食，想做個香港人，我記得入行第一首歌，派台前一晚，我同監製講我之後會如常拖住我女朋友周街逛，點知首歌一出街第二日，我就同記者講我冇拍拖，人類總會喺龐大外在壓力之下自然地放下自我，然後，有一日自我成熟 又有可能會擔心其他問題而繼續忘記自我，『自我』其中主要元素是人類互相之間共通的價值觀。」

他續說：「呢排我成日好感動，因為見到一班年輕人，佢哋守護緊自我價值，我哋社會嘅價值而奮鬥，喺我度留言「舉中指」嗰位朋友都係一位年輕人，點解佢嘅價值觀係咁？點解佢要去人哋個Facebook舉中指？（有人留言話佢好似係盧偉聰啲下屬喎？）因為佢嘅價值觀同我哋唔同，佢覺得自己啱，所以我回覆佢乜嘢都冇用，唯一可以講就係『關佢叉事』（但其實真係關佢事㗎）！」

最後天佑說：「奀星？咁係咪星？天上面啲星？即係近地球啲？易捉摸啲？貼地啲？貼地啲咁咪好囉，因為我哋都係香港人#我講嘅嘢只代表徐天佑本人」不少網民留言力撐天佑，表示很開心見到一個敢言的香港人，甚至有fans稱以他良心為榮，林日曦留言：「就當係奀星。奀，因為不大，保持赤子之心，就會自然發亮。」

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX