喺無綫劇《律政強人》俾網民讚型到爆嘅53歲型佬方中信，依家大家除咗討論佢嘅角色之外，連帶佢同莫可欣嘅婚姻亦都有唔少人注意。

方中信o依家有型又靚仔，作為佢太太係咪會好憂心呢？其實說話又唔可以咁講，因為早喺方中信同莫可欣未結婚嘅時候，方中信就已經當住傳媒話莫可欣唔靚，仲大讚佢嘅人品。

好耐之前有報道指蘭子因為難以接受方中信同莫可欣拍拖嘅事實，一次兩人相遇，有人一時控制不住，掌摑莫可欣，但莫可欣卻未有追究，當時方中信仲話：「我知，呢啲係包容，雖然佢（可欣）唔靚，但人品OK，呢方面人夾人緣。」(新聞連結: http://bit.ly/2dns4vW )

呢排方中信就人氣急升，所以呢件舊聞又被拎返出嚟講，網民就喺「親子王國」開咗個PO，紛紛留言力撐莫可欣：
「我唔會嬲，佢講事實，好多講埋多餘的甜言蜜語」
「我係莫可欣先至唔會嬲，靚唔靚又點？反正佢娶嘅係我，我反而覺得蘭子係咪有問題？分咗手同邊個拍拖關佢乜事，仲要掌摑莫。」
「真愛包容一切，女嘅咪包容番個男講嘢直。」
「掌摑完都不還手，呢樣已經贏晒，方生咁靚仔有咩靚女未見過，反而人品好嘅女人先夠特別。」
「其實幾欣賞莫，佢由當選開始已經俾人話唔靚。佢呢二十年繼續過佢自己嘅生活，繼續唔靚唔打扮唔keep，冇去微調，唔理記者點笑佢。EQ超高！」

方中信依家同莫可欣嘅生活過得好開心，囡囡符迦晴嘅出現，簡直改變咗方中信嘅一生，佢仲自爆已經俾被囡囡收得貼貼服服，連脾氣都冇以前咁大。