親（亲）不見，愛（爱）冇心，這些痛斥簡化字荒謬之口訣，其實還有一句很值得留意──兒無首（儿）。可愛BB無啦啦因為簡化冇咗個頭，你話幾不可理喻。別號「青山不墨」的80後書法老師賴碧琪，每天都在facebook分享一幅正體字書法作品。她特別欣賞象形漢字因形知義的獨特美態。她說：「兒字上半部份代表嬰兒嘅頭，下面一撇就代表佢嘅手，另外嘅豎彎勾就係佢嘅腳。我哋成日話『腦囟未生埋』，所以兒字嘅上半部份有個開口，字形同字義相關。」兒字看來簡單，其實殊不簡單！「簡化後刪掉上半部分，就好似個嬰兒冇咗個頭，只剩手同腳。」好殘忍，如果有人想下一代只懂簡化字，真係好殘忍。

簡化字很多時重音不重義，常以較少筆劃的同音字代替，令人容易混淆。撐正體字及粵語的組織「港語學」召集人陳樂行舉例：「裏字本義係衣服內層，簡化後成咗里字。用普通話讀佢哋係同音字，喺廣東話唔同音，而且裏字同里字嘅意思風馬牛不相及。」

簡化字老是常出現「又」字字符，取代原來的部首。「簡化後歡字與雞字寫法差唔多，閱讀嗰陣要花時間辨認，令我哋讀書認字有困難。」簡化字不便使用，又失去本來的文化含意，學睇根本唔難，但要取代正體字地位？真係冇乜可能。招牌上、餐牌上、路牌上用這種漂亮的字體，方便香港人閱讀，我們豈能不珍惜？

記者：葉青霞
攝影：陳永威、徐振國