噚晚先報道過，效力熱刺嘅前法國U21小將尼高杜唔知發咩神經，竟然着上車路士練習衫同阿仙奴球迷合照，一張相連犯兩個大忌，即刻惹來「刺迷」反彈，揚言要球會賣走佢。其實呢啲職場禁忌，稍為醒目少少都識避忌吓，尼高杜不妨學吓巴塞隆拿門將施利臣有幾「襟撈」？

施利臣日前出席簽書會時，唔知點解有位小球迷着起巴塞死敵皇家馬德里波衫「踩場」，咁大個「關公陷阱」喺面前，呢位28歲荷蘭國腳門神情急智生，左手搭住小球迷膊頭，右手就攞本書遮住波衫上嘅皇馬logo，既冇托小球迷手踭，又唔會得罪巴塞球迷，掂晒！難怪施利臣上季唔夠達史特根爭正選位，但網民相當欣賞呢份忠誠，大讚佢係巴塞傳奇咁話！