【韓流】《學校2017》首預告 網民批金正鉉顯老 金世正演技差
金世正學校2017金正鉉
韓國KBS電視台推出嘅劇集《學校》系列,將於今年推出新一集《學校2017》,接檔《三流之路》於7月17號首播。日前兩位主角金世正及張東尹被拍得喺街頭開工,而劇組方面今日公開咗第一個預告。
預告中剪接咗女主角金世正身穿校服、騎電單車返學途中嘅場面,仲有佢同好友食飯、開玩笑嘅場面,金世正飾演嘅羅恩好係一名性格開朗嘅學生,所以預告亦見金世正不時露出燦爛笑容。預告中仲有一幕佢同男主角金正鉉一齊疑似坐喺頂樓嘅畫面,似乎顯示兩人嘅感情發展。
不過預告公開後網民意見就好兩極,有網民認為劇中演員嘅演技生疏:「金世正笑得好假」,又指現年27歲嘅金正鉉外貌唔適合演學生,直言「着起校服都唔似高中生」、「之前嘅《學校》系列好睇得多,唔想支持新劇」等;不過都有網民力撐演員,表示起用新人一向都係《學校》系列嘅特色,唔應該因為一班演員係新人就忽視佢哋嘅努力。