百萬像素影相手機今期大熱，不過價錢仍未算「大眾化」，閒閒哋都要3千蚊以上先有偈傾。之但係亦都令30萬像素影相手機有生存空間，所以新機依然出完一部又一部。就好似NEC新機N728，主要規格都係6萬5彩芒、64和弦、30萬像素鏡頭等幾樣大路嘢，但係都唔係話全無新意。首先機身體積比同廠8系清減得多，銀灰色機殼襯得相當順眼，男女用家都易接受到。而機內更特別有MP3播放程式，閒時可以當埋MP3機用，不過可惜嘅就係機內只有32MB記憶體，真係勉勉強強只夠擺幾首歌。另外，特別一提嘅就係，唔好睇外芒只有4,096色，而且成個長條形，原來一樣可玩自拍，不過自拍時個螢幕就只有幾mm，真係少啲眼力都睇唔到！

記者、攝影：劉耀祥