說起廣告行業，可能第一時間會想起設計、製作、度橋及推廣等方面，但當中Media Agency亦擔當着重要位置，而且還可以讓員工見識不同的事物。《青雲路》在6月尾舉辦《職場大贏家》免費講座，就邀請到從事Media Agency二十多年，現為MindShare業務總監的Gal擔任演講嘉賓，分享行內資訊及入行的面試技巧，讓有興趣人士可以更了解工作狀況，找到適合自己的道路。

Gal是MindShare的業務總監，他表示有不少新人未必太了解Media Agency的工作，「主要係做廣告策劃及統籌廣告客戶嘅預算，除咗需要市場觸覺外，當中仲會涉及大量數據分析，所以要有心理準備去處理大量數字。性格上要有好奇心，肯試新事物嘅人會較適合做Media Agency。媒介市場變得好快，好似1、2年前仲講緊桌面版嘅網頁廣告，但現在已經係流行手機版，所以要不斷學新知識，對鍾意試新事物嘅人嚟講，份工會做得幾開心。」

另外，Gal表示應徵者面試前應多作準備，「呢行嘅面試官有個常問嘅問題，就係要應徵者講吓最近印象較深刻嘅廣告，所以應徵者喺面試前最好留意多啲廣告。當中唔一定要有好獨到嘅見解，只係想睇番應徵者有冇自己嘅諗法，同時表達出對呢行有興趣，唔係隨口講。」

畢業後即入行
從事Media Agency二十多年的Gal，在樹仁修讀工商管理及市場策劃，畢業後便入行，「喺讀書時，我已決定加入廣告相關嘅行業，之後亦順利應徵一間Media Agency公司。初入行係做media executive，主要做文書工作，睇唔同嘅調查報告及收集返嚟嘅數據，再因應要求做成唔同嘅報表，每日工作量都唔少。」

00年，Gal加入MindShare，他表示見證着這行業的變化，「由初入行時，廣告客戶大多將預算投放在電視及報章，到現時會將70%至80%嘅預算放喺手機app及social media嘅平台上。要接觸市民嘅渠道亦愈嚟愈碎片化，以前可能幾個平台就可以接觸到9成目標客人，但現在就要用10個或以上嘅媒體先接觸到同等數量嘅市民，要做多唔少工夫，但同時亦多咗空間可以發揮。」

教學相長
11年，Gal成為了樹仁大學市場策劃的客席講師，他表示可以教學相長，「自己做咗Media Agency多年，教書時可以將貼近實際工作嘅知識教授畀學生，同時亦可引用較新嘅例子。另一方面，我不時同學生傾偈，從而了解到現時年輕人較鍾意用乜嘢媒體，新興嘅平台及偶象等，會令我喺工作時，有更多參考嘅數據，仲有機會物色到有潛力嘅同事。」

從事Media Agency多年，Gal表示對這行仍抱有熱誠，「呢行可以接觸到唔同嘅廣告客戶，見到唔同嘅人，增加唔少見聞；加上行業變化得好快，不時有新科技及媒體推出，令到工作多咗挑戰性。嚟緊AI科技日漸成熟，我希望可以將AI運用喺工作上，令客戶滿意。」

搵好工，即上 http://www.ecjobs.com.hk