正當泛民主派重喺度「協調」緊批唔批准梁家傑入行政會議，點知阿董呢頭經已公布新人選，新早餐派嘅陳智思同埋得蒙中方睇起過嘅查史美倫，雙雙入局，知情人士通報，呢步棋，以董團夥嘅智力，根本無從諗起，係有中方在上喝令督卒上馬，先至爆個冷門。

鎮住卿姐小型政變
皆因為喺泛民主派僅取得二十五席之後，阿董以為經已大獲全勝，所以至講咗句「選舉結果好Comfortable」嘅無厘頭笑話。語音未落，就俾劉慧卿發動小型政變得手。
新早餐派泛聯盟同土共，都唔妥中指黃，財委會主席落在卿姐手上。中方如夢初醒，先知道立法會內確有個泛聯盟嘅「陰陽界四五行動組織」，雖然得嗰四五個人，但左右踩界，可以毋須畀面中董當局，鍾意起上嚟就跟大班肥詹佢哋起旗，所以有關人士下令阿董，快手擸番件陳智思招安入局。