羅蘭、高海寧同吳卓羲今日喺海洋公園出席「哈囉喂全日祭」，高Ling收起性感，以白髮魔女造型示人，不過今日有「龍婆」羅蘭坐鎮，好玩得嘅羅蘭姐出場時載歌載舞，但跳跳下竟然甩褲，露出肉色打底褲，不過佢處變不驚，慢慢將褲頭拉起，繼續完成整個舞步。

事後羅蘭姐話：「好彩有條長褲打底，因為條褲好重。」今年仲有間主題鬼屋，羅蘭姐會聲演嚇人，佢話：「今年好巴閉有間古董店，之後都會帶班老友記來，不過有人話驚唔敢去。」

同場嘅吳卓羲話曾經同跟一大班朋友去哈囉喂，有男有女，不過就否認會借機媾女或抽水，佢話：「我自己都驚，唔會乘人之危喇！帶女仔嚟梗係唔夠膽，怕見到記者。」