發展局噚日公佈，局長黃偉綸今日北上，聯同香港工業總會代表團，出席哈爾濱國際冰雪節開幕式，不過發展局工作同冰雪節大纜扯唔埋，為乜黃局長千里迢迢去一趟呢？唔通香港冇乜緊要嘢做？定黃局長對哈爾濱風光景點好有興趣？
八方睇新聞稿，黃局長今抵哈爾濱，出席市領導宴請及文藝晚會，周六為一場香港與哈爾濱的青少年冰球賽主持開球禮，之後參觀哈爾濱國際雪雕藝術博覽會，同哈爾濱國際冰雪節開幕式，星期日返香港，睇呢幾項行程，似乎同發展局工作冇乜關係，至於點解係與香港工業總會同行，新聞稿都冇說明。
發展局新聞秘書回覆《蘋果》，話局長今次係應哈爾濱市政府邀請，代表特區政府出席哈爾濱國際冰雪節開幕禮及相關活動。至於此行開支總數包括機票、交通等金額就有待確定。有人私下向八方講，據知以往特區駐京辦都會派員出席冰雪節，今次主辦單位想「升格」請問責官員出席，政府就搵咗黃偉綸做代表咁話。