林珊珊兩個囡囡西瓜(李澄)同野人(李怡)，噚晚喺屯門出席酒店開幕活動。呢對李氏兩姊妹最近越嚟越多一齊出席活動，佢哋都話鍾意黐埋一齊，仲想一齊拍廣告，西瓜話：「細個已經自己玩拍健身器嘅廣告，阿妹喜感好重，演技好cute。」

講到野人同崔建邦分手，唔知野人心情好番啲未呢？野人反問：「冇嘢㗎，點解會有嘢?」身為家姐嘅西瓜即刻幫口：「阿妹係happy girl，又或者調轉講，佢咩情況下心情都嘛嘛，野人嚟㗎嘛，Hyper啲，獨特啲。」野人繼續反問：「點解要唔開心？我好愉快。」西瓜又繼續扯開話題：「聖誕想一齊出去玩，兩姊妹對上一次一齊出埠，已經係半年前去新加坡做嘢，今年我要做DJ，阿妹搞瑜伽。」問到野人仲有冇同崔建邦聯絡，佢笑住反問：「咁你有冇呀。」有傳崔建邦搭上藝人李靖筠，係咪出現第三者?野人話：「我唔評論，呢個唔係我嘅事，要問當事人。」野人仲話自己唔心急再拍拖，踢爆媽咪林珊珊心急啲，不過西瓜就話其實媽咪冇時間拍拖，只係希望多啲時間見到兩個女。

更多娛聞，喺晒《娛果》
http://fb.com/appledailyent