採訪手記:食飯用筷子大忌

蘋果日報 2002/05/29 00:00


去到南韓城市,要品嘗韓式料理,好多時都離唔開食辣;當然亦有中國人最重要食糧──飯。不過,喺南韓飯店拎起碗白飯時,千祈唔好用筷子夾飯。
除泡菜之外,白飯都係南韓人平時主要食糧之一;但食飯方式習慣就同中國人唔同,通常都會用鐵匙,而唔係用筷子。因為南韓人認為用筷子食飯等同乞丐,小記初時唔知就照用筷子食飯;後來發覺每一次用都引起當地人投以奇異目光,到近日先知道原因何在。提醒一下即將到南韓睇世界盃球迷,到韓式飯店「醫肚」時,記得用鐵匙食飯。

入夜轉涼記得帶衫
除食飯文化要知道外,天氣都值得注意,因為今屆世界盃決賽周正係南韓同日本雨季,故濟州連日天朗氣清都開始變得烏雲密布兼落雨;入夜重感到寒意。採訪中國隊操練時,唔少記者都話無留意夜晚氣溫下降而「中招」;而喺南韓睇一次醫生,非當地人要成一千港元,所以提醒準備到現場睇波嘅球迷,記緊到時帶多件衫呀!