馬友在通訊群組猛呻剛周三尾場押注「幸運興隆」獨贏咁都影輸，仲要10倍咁好分，皆因埋門有兩隻馬狂落飛，分別為「好力煌」同最終影贏的「育成寶貝」。

馬友又話所謂見過鬼都會怕黑，「幸運興隆」好幾次埋門賭到着格都贏唔到，再追住買點都要衝破心理關口；至於「好力煌」跑谷草1200米嫌短，唯一可取是剛周三用潘明輝減七磅，對比上季尾入圍時評分的確有利，但以普羅馬迷傳統賭馬智慧，也未必會吼。

所以剛周三大戶下注「育成寶貝」及「好力煌」，大可推斷不是人為決定！也反映了就算不同電腦程序甚至是人工智能，都時會有「硬頸」這個共通點，同晚「肇慶威威」一連兩次埋門落到25蚊唔夠又是另一例子！電腦死牛一面頸，皆因長期這樣運作，埋單計數仍然有贏，相反散戶未必有足夠彈藥長追。

今期(17日)沙田第十場二班1400米，田泰安座騎「怪獸家長」近兩季多番被大戶狙擊，但仍未交到數，季初1400米走蝕位才僅跑第三，而剛戰不合泥地，落敗未宜作準，信人家判斷無錯的話，可再坐一次順風車。