禮拜一嘅港股確實係有啲陰陽怪氣。美股上週五大插插後，我諗住香港接住唔跌一千，都會跌五百。點知居然只係裂口低開幾十點。跟住最多跌兩百幾後，就一支箭咁升，全日埋單倒升兩百幾。

點都好，禮拜一勇衝入市買入嘅人，間接都包括我。因上週當恆指仲喺31300點時，我喺FaceBook宣佈買嘅恆指put，禮拜一都沽出攞番個本。淨番嗰啲睇今週美股表現，因為未來幾日會非常之key。

剛過嘅週末，孫柏文睇到有好多花旗國嘅寫手，都攞番1987年出來講。因啲條件今日又見到。例如貿易戰、弱美元、長息扯高、短息又加、股值極高等，通通又浮現。

咁點先會發生？上週五，美股雖然跌得勁，仲要係全日兼全週低位收市。不過最能代表花旗股市嘅標普五百指數，就啱啱停咗喺200日平均線到。對上二月大震倉一役，又係快速落到200日平均線之後就反彈。所以呢條線係第一條防線。我覺得會幾難穿，所以我買咗嘅puts都先減磅。

而第二條防線，就當然係上次二月個低位。呢幾日，大家一定要睇實標普五百指數，如果企得住，冇事。不過如果到禮拜四跌穿200日平均線及二月低位，而禮拜五學上個禮拜五嘅跌幅，我可以好肯定，下週一港股唔會好似今週一咁。

如果美股咁，下週一恆指都仲係裂口低開幾十點，你就要學到時嘅我咁，一注獨贏、不問加追、當埋條底褲瞓身買put賭股災。

孫柏文

蘋果財經，關心你飯碗
http://fb.com/appledailyatm