噚晚杜德偉、李蕙敏同寇鴻萍喺金鐘出席「法國電影節」睇《時裝巨人的狂情歲月》，呢套電影係講時裝巨人「聖羅蘭」(YSL)嘅故事，杜德偉就以一身YSL服裝現身，佢話:「本身好鐘意呢個牌子，覺得好有風格，之前同老婆去巴黎買衫同玩，但唔止呢個牌子。」係咪大出血?佢話:「都算係，其實今季YSL嘅貨都買晒咁滯，大概花咗100萬，好耐冇買嘢，之前做演唱會好忙，忍手冇買嘢。」

講到日前鄧紫棋(G.E.M.)記者會擺巨星架子，問佢作為前輩點睇，杜德偉就話:「其實現今呢個樂壇入面，我同而家嘅人心態都有啲唔同，我出道當年嘅環境都唔同，現今歌手點睇呢，我就唔太了解，好難作出評語。」問佢覺唔覺得咁樣做嘢好啲?佢話:「冇乜所謂，HAPPY就得，唔使咁認真，同G.E.M.喺內地試過合作，但冇一齊合唱，唔係好熟，唔好睇我係咪前輩，我都唔鐘意咁樣睇自己。」

寇鴻萍就話嚟睇下傳奇人物故事，又表示兩個女好忙:「大女今日要開會。」啲女好乖?佢話:「我全職做保險，啲生意交俾啲女。」講到o依家星二代好開放?佢話:「有時放工放學去玩都係放鬆下，冇乜所謂，可能後生比較熱情，我啲女都有去玩，但就唔會影響返工返學。」啲女好自律?佢話:「父母都會了解身邊啲朋友，的確會近朱者赤，青少年易受人影響，啲朋友我都會識，對佢哋好放心，遇到問題會比意見，唔會一味唔準。」佢又話啲女中學已經係男女校，所以朋友間男女都有，但就唔知佢哋有冇男友。