紐約人周三終於忍無可忍辭退籃球事務總裁積遜（Phil Jackson），令唔少球迷拍手叫好，但正所謂衰開有條路，隊波陣「畢味」似乎仲未洗得甩。話說球隊周四喺奧蘭多展開夏季聯賽第二日集訓，應屆NBA選秀第8順位選中嘅18歲法國控衛尼迪傑拿（Frank Ntilikina）當然有出席，但佢初來埗到已經黑氣纏身，繼首日已經觸傷膝頭，第二日着嗰件練習衫又俾人串錯晒個名，由Ntilikina變咗做「Ntilinka」，錯到離晒譜，最唔敢睇係紐約人自己上載呢張相，最後要急急刪post。

點解可以串錯得咁離譜？有網民就諗到個好好笑嘅陰謀論。話說現時效力網隊嘅控衛林書豪（Jeremy Lin）當年掀起「林來瘋」（Linsanity）時都係着17號，網民就猜測紐約人唔知係環保定縮骨，將「LIN 17」呢件練習衫前後加番啲字母，就咁亂拼「Ntilinka」出嚟濫竽充數…堂堂「大蘋果」球隊，唔會咁cheap啩？