由一向言論出位嘅馬恩國擔任主席嘅中澳法學交流基金會，去年搞咗個法律界一帶一路訪京團，當年馬恩國會後引述京官「金句」，話對付港獨「要槍有槍，要炮有炮」，點知訪京活動被同行團友搶晒「風頭」，皆因有團員被踢爆喺訪京期間「喜愛夜蒲」，引起社會熱議。

之不過咁，小小槍炮挫折未有成為佢嘅心魔，基金會今年決定再北上交流。馬恩國同八方講，會喺11月初帶團訪京4日，拜訪唔同單位，期間會就香港近期熱議嘅法律問題交流，例如拜會港澳辦時，應該會講下一地兩檢嘅爭議，佢認為民主派嚟緊可能會就一地兩檢方案提出司法覆核，所以特別想針對有冇牴觸《基本法》嘅法律爭議，交流一下應對建議，佢同時都想講下近日熱議嘅《國歌法》。唔知佢此行最大心願，係咪團友生生性性？