台灣組合「MP魔幻力量」嘅主音嘎嘎（潘俊佳）舊年流出同女友安心亞嘅調情短片後，掀起連串風波，最後要搞到公開道歉、又被罰禁足演出半年，舊年10月佢嚟香港開騷先叫「出雪櫃」，當時佢重提被雪藏時仲話：「都怕大家忘記我，現在站在台上feelsogood。」

諗住佢經一事長一智啦，點知今日被台灣雜誌爆料喺舊年12月23號，同女團Populady成員寶兒（吳昀廷）喺暗巷擁吻，仲當街揭起女方件衫，被網民狠批佢「不尊重女生」，點知，到咗今日下晝5點幾，嘎嘎所屬嘅相信音樂決定炒佢魷魚，勒令佢退團。

台媒引述相信音樂於傍晚表示：「我們已經給過嘎嘎不只一次機會，不能再讓他一錯再錯。我們不鼓勵，更不贊成這樣的不良示範。今天我們不得不忍痛做出決定：在完成已簽訂合約的1月31日最後一場活動演出後，嘎嘎將會正式退出MP魔幻力量。」

其實事件女主角寶兒，早前已經透過經理人公司華研經紀公司，否認同嘎嘎拍拖：「一直蠻欣賞他，是很好的朋友，近期開始關係比較密切，那天他確實有喝些酒，但二人關係還沒到交往程度，但知道他目前是單身。」

至於舊年短片嘅主角安心亞，被問到嘎嘎俾人影到當街揭女仔衫嘅睇法時，安心亞嘅經理人公司表示：「心亞已許久未跟他（嘎嘎）聯絡，且那是別人的隱私，與心亞無關，我們不方便代為回應，謝謝。」

嘎嘎今次失戀又失業，唔知會點收科。