15年前，關智斌（Kenny）同張致恆（Steven）被英皇睇中，將佢哋組成男子組合BOYZ出道，不過佢哋05年起獨立發展，後麥子豪加入為BOYZ新成員，陳偉霆06年加入，三人以新組合名稱Sun Boy'z再闖樂壇，由Steven擔任隊長，08年陳偉霆同麥子豪退出。10年Kenny同Steven又重組BOYZ，兩人兜兜轉轉。

依家Kenny已37歲，Steven都已33歲，佢哋下月16號會合體喺九展Star Hall舉行一場演唱會，估唔到BOYZ成軍15年，依家先有機會開處男騷。BOYZ今年6月做張敬軒紅館個唱嘉賓，反應唔錯。軒仔同Kenny曾被指有斷背情，一傳仲傳咗10年，前年先至有消息話佢哋長期隔地分隔情濃轉淡，大家先至斬纜。（新聞連結： https://bit.ly/2JJhuk6 ）當晚BOYZ出場即同軒仔合唱《死性不改》，全場歡呼狂叫。（新聞連結： https://bit.ly/2ldXuai）

BOYZ喺軒仔演唱會試咗水溫，對佢哋處男騷注咗強心針，佢哋個騷今朝10點公開發售，反應唔錯，網頁繁忙，首頁都入唔到。好多粉絲仲喺Kenny社交平台留言投訴買唔到飛，要求加場。Kenny表示：「多謝粉絲支持，我哋會努力綵排，演唱會當晚仲會渾身解數。」正喺台中比賽嘅Steven就話：「我噚晚好緊張，畢竟第一次開賣演唱會，今朝開賣有咁好成績，我先鬆一口氣。希望當晚入場嘅粉絲朋友，可以一齊集體回憶。」

精選娛聞，喺晒《娛果》
http://fb.com/appledailyent