蔡卓妍（阿Sa）同周柏豪今日喺荃灣出席《原諒他77次》電影見面會，佢哋最近宣傳嘅行程排得密麻麻，就連阿Sa都覺得人驚，柏豪話：「我好鍾意完場嘅時候謝票，因為可以聽番觀眾嘅問題同意見。」問佢哋怕唔怕情侶睇完套戲，會成為分手嘅導火線？佢哋話：「如果睇一套戲就要分手，咁呢段關係好脆弱同有問題，我覺得應該要作出討論，令感情再進一步。」

問柏豪怕唔怕老婆睇咗會呷醋？柏豪就話：「少嘢啫，我哋尊重大家，有足夠溝通。」阿Sa都認同，仲話柏豪嘅MV仲激！此時柏豪就重提舊事，講番早年被嘲疑似愛情動作片男優，最矚目係佢當年嘅比比鳥頭，阿Sa笑言未睇過，仲問人攞條片話：「Send畀我，睇吓佢嘅表現。」阿Sa話希望套戲有好成績，票房最少要有1,000萬，柏豪話：「如果超過1,000萬，阿Sa就裸泳。」跟住阿Sa都唔輸蝕，爆笑話要柏豪拍番套「比比鳥」，不過阿Sa就唔肯做柏豪對手，話自己駕馭唔到。

另外，阿Sa月底就會去加拿大拍一部懸疑電影，佢話因為食唔慣西餐，到時要帶定電飯煲，而8月又開拍另一部，電影一部接一部，阿Sa笑話：「搵餐飯食啫。」