錢嘉樂、鄭伊健、陳小春、謝天華同林曉峰上星期五到杭州舉行「歲月友情演唱會一起兄弟篇（杭州站）」，生完第二胎嘅湯盈盈，坐完月之後就帶埋大女Alyssa去捧老公嘉樂場，兩歲嘅Alyssa嘅觀眾席冇扭計，好淡定咁睇爸爸表演。

適逢當日係嘉樂同盈盈嘅結婚3周年紀念日，台上嘉樂就借咗伊健隻歌《同一秒》嚟送畀老婆，佢自彈自唱冧到爆，不過就好緊張咁用半鹹淡普通話講「第一次結婚」，一時又話「唯一一次結婚」、「希望是最後一次」，越講越亂，令全場爆笑，慶功宴上盈盈爆料：「佢（嘉樂）成日喺屋企唱歌，好鬼冧㗎！」嘉樂話：「佢哋嚟，我最冧！」兩公婆非常冤氣。其實當日亦都係小春同老婆應采兒嘅結婚5周年紀念日，雖然應采兒有工作在身冇嚟，但小春喺台上都有唱《相依為命》隔空傳情。而林曉峰就放笑彈話：「我哋曾經諗過用我哋個名併成隊名『春風樂健華』，但好似按摩店名！」