黃心美、王宗堯、游學修同邵音音今日現身奧海城，參與ViuTV舉辦「第37屆香港電影金像獎頒獎典禮—ViuTV紅地毯司儀招募活動（決選）」，6位參賽者經過即埸考驗後，最後由毛曄穎與董易靈勝出，奪得金像獎當日嘅採訪證。

曾經擔任過金像獎紅地氈司儀嘅心美，指當年擔任司儀前做咗好多事前準備功夫，了解各位紅地氈嘉賓獲提名資料及以往電影作品成績，即使面對住巨星如周潤發，佢亦自問能做到應有表現。心美覺得能夠同偶像訪問比合照更難得。

問到最難忘一次訪問係點樣？心美話：「因為外國版《無間道》（《無間道風雲》The Departed），我有機會去訪問里安納度（Leonardo DiCaprico）同麥迪文（Matt Damon），我記得事前同麥迪文講我好緊張，訪問尾段佢話『Well done, Scarlett!』，我好感動佢竟然記得我個名。」今年心美只會行紅地毯，問到會否期待有日以提名身份去出席，佢笑言：「唔會諗呢啲。」

至於有份擔任評判嘅王宗堯大讚兩位勝出者做足功課兼執生能力高，佢本身很怕面對唔識發問問題嘅司儀，反而唔怕刁難自己司儀，假如遇到都會忍讓。今年金像獎，佢較期待新導演同新演員獎項，至於影后則欣賞《相愛相親》嘅張艾嘉與《黃金花》嘅毛舜筠。

精選娛聞，喺晒《娛果》
http://fb.com/appledailyent