當年今日
關於我們

蘭西情報課:幾時邊度有新盤此中尋

蘋果日報 2004/12/24 00:00


𠵱家啲人對資訊要求愈嚟愈高,要快要準,重要有前瞻性。美記樓市新供應巡禮,啱啱上網,未來幾年住宅新供應數據,一網打盡。
除咗可以click分區地圖,睇晒嗰區供應,又可以click某個新盤,跟住就搵到相關資料,部份有圖為證。例如想知西環泓都,click入去,喺張相下面有樓盤中英文名、位於香港堅尼地城新海旁街、發展商為新世界及市建局、已批預售樓花同意書(即係隨時賣得),共有1182單位,夠晒清楚。
網址係:www.midland.com.hk/agency/chi/forecast/
除咗網上地圖,美記將供應數據應用喺月曆上,設計咗款座枱月曆,每個月有乜樓落成,一目了然。聽講,呢個籌備咗半年嘅月曆,唔少美記員工搶購。首批賣得二萬幾,扣除成本後,會捐畀美聯慈善基金。

換樓竟然買期貨
鰂魚涌太古城有個業主,住緊兩房單位,計劃換入個三房,睇咗幾日樓,最終竟然買咗個重有一年租約嘅單位,八百呎,作價四百一十幾萬,每呎五千二百幾。
美記何顯德話,連租約嘅,自住客一般唔吼,不過,呢個買家住開太古城,知道衛星閣高層H呢類貨色,景觀開揚,望平台花園、公園兼少許海景,質素僅次於海景,但係呎價就低兩成,平均一年只有一兩件放盤,為免錯失良機,即使要等一年,先至完成換樓大計,亦在所不惜。
代理分行加料
樓市好景,地產代理爭相開分行,為咗加強競爭,當然要諗計求突破。
祥益計劃將六間逾千呎分行,包裝成megashop,提供更多元化服務。
祥益地產總裁汪敦敬話,呢六間megashop係屯門海典軒、海翠花園、新屯門中心、海麗花園及西鐵屯門站分行,同元朗嘉湖銀座分行。
分行內設有小型展覽廳、咖啡閣、禮賓部、按揭諮詢部等,實行一條龍服務。

加州花園嚴重低水
藝人許冠文日前連掃兩個元朗加州花園洋房,消息曝光,有人想知道,嗰區係咪抵買。
蘭西向中記龍智烽查詢,佢話,加州花園高峯期呎價八千,𠵱家只係二千八至三千二,明顯落後大市,可以用「嚴重低水」嚟形容。
佢話,今個月頭十八日,加州花園完全冇成交,過去周末突然有四宗,上個月全月就係十二宗。
現有一百九十六個放盤,比上月嘅一百八十五個多,加上成交少咗,業主願意擴大議價幅度至五巴仙,重肯畀長交吉期,預料成交逐步回增。
今年賣樓一半有賺
今年就快過去,係時候回顧一吓個樓市,中原地產黃昇表示,今年截至本月二十日,總共有三萬四千幾宗,知道業主買入價嘅成交登記,當中有一萬七千幾宗有錢賺,比例近五成一,連續九個月高於五成。舊年只得近三成二。
今個月嘅獲利比例係五成七,較上月跌近兩個百分點,但都係今年第二高。
詳細分析,原來今個月嘅獲利宗數,佔三成一係賺幅一成至兩成,其次佔兩成四賺幅係低於一成。
賺幅能夠高於五成嘅,則只有八點七巴仙,呢班人真係夠晒好眼光。

德福廣場旺丁
地鐵商場每逢過時過節,都大搞宣傳活動,所以人流量零舍高,好似今個聖誕,一早已經裝身,又提供優惠,過去兩個周末,九龍灣德福廣場人流,分別係二十四萬五及二十六萬,比平日高一成及一成四。青衣城商場增加一成二。
今明兩日係節日高潮,商場有銀樂隊表演,重有聖誕音樂馬拉松,由唔同學校嘅詠詩班,以馬拉松方式獻唱聖詩。商場內有聖誕老人派禮物,又有「流動購物大使」為大家提供最新優惠資訊。當然,唔少得嘅,就係購物一定有優惠啦!
電郵地址:[email protected]
empty
美記網站
empty
千金難買心頭好,太古城換樓客,縱有大把交吉樓選擇都唔要,買入連租約單位,寧願等一年先圓換樓夢。
empty
銀樂隊陣容都唔簡單,係吸引消費者嘅招數之一。
empty
各校詠詩班,喺場內馬拉松唱聖詩。