現年38歲嘅韓劇《OH！必勝奉順英》女星秋瓷炫日前自爆於今年1月嫁咗畀36歲大陸男星于曉光，秋瓷炫同于曉光喺出演嘅韓國綜藝節目《同床異夢，沒關係沒關係2》上公開結婚證書，兩人不時喺節目上晒幸福。喺最新一集節目中，兩人繼續奉旨晒恩愛，當中秋瓷炫就花咗15個鐘先到達老公嘅拍攝地點，兩人一見面仲即刻恩愛攬攬，原來因為兩夫婦有成21日冇見面，自然好鬼掛住對方。

而新婚嘅秋瓷炫將會回歸韓國演藝圈，今日韓媒指佢有望攜JTBC新劇《Misty》回歸公仔箱，一切暫時仍未有定案。秋瓷炫之前長期留喺大陸發展，不過最近已返回韓國，佢自然抽空見好友，當中今日韓智敏就上載一張與秋瓷炫及韓孝珠嘅合照，原來三人係好朋友，而升呢做人妻嘅秋瓷炫仲變身大廚，炮製美食，當中三人都以淡妝或素顏示人，網民都激讚三人美貌不分上下。

另外，曾同韓孝珠合拍《W》嘅李鍾碩亦頻頻喺Ig晒新相，當中有拍攝新片《V.I.P》時嘅照片，只見佢滿頭鮮血，唔知拍緊乜嘢場口，而李鍾碩亦懶理佢呢個受傷造型，周圍同人影合照，十分搞笑。