韓國tvN綜藝節目《名單公開2017》於前日播出嘅節目中，盤點咗「狠毒瘦身」嘅藝人，結果由韓劇《Doctors》男星金來沅獲節目組盤點為第一名。

據節目組透露，金來沅係易肥體質，曾因為經常食漢堡包而肥到198磅，而佢間唔中現身活動時都好明顯見到佢肥咗。不過當金來沅落實拍劇後就會狂做運動減肥，每次起碼減22磅或以上；據知金來沅拍攝《江南黑夜》時一個月內激減33磅，仲以勁弗體態拍攝裸露戲。

第二名就係韓劇《Signal》嘅趙震雄，節目組表示趙震雄曾為作品增肥至272.8磅，之後勁減88磅回復到正常水平，不過趙震雄嘅體重亦好反覆，佢年初曾自爆為拍攝韓片《海冰》而減咗近40磅。第三名就韓劇《舉重妖精金福珠》女星李聖經，模特兒出身嘅李聖經一向身形瘦削，為咗劇集而增肥11磅，於拍完《舉重妖精金福珠》一個月內減到原來嘅體重。

韓劇《芝加哥打字機》男星高庚杓就獲節目組選為第4名，節目組指高庚杓同金來沅一樣，休息期間就好易肥，曾達198磅嘅高庚杓減肥時，就會喺瞓覺前4小時唔食嘢，同時Keep住做運動，一個月內減咗33磅。第5位就係女團DIA人氣成員鄭采妍，鄭采妍為咗成為歌手，出道前140.8磅嘅佢每日只食少量嘅豆腐、小蕃茄，極不健康地喺三個月內激減35.2磅。

及後依次為韓片《軍艦島》男星蘇志燮、韓劇《不要猶豫》女星李泰林、韓劇《心裡的聲音》女星庭沼珉。