2017年娛樂圈陰雲密佈，離婚、患癌、母女反目相繼發生，「民間特首」劉德華更墮馬受傷令盆骨骨折，鑊鑊新鮮鑊鑊甘！

劉德華墮馬受傷
1月17日喺泰國拍廣告墮馬受傷，坐醫療專機返港送入養和醫院，檢查後證實盆骨多處骨折同筋腱肌肉拉傷，要取消年尾紅館跨年騷，留醫兩個月才出院，住院期間，老婆朱麗倩同囡囡劉向蕙常伴身邊。經過203日休養，8月8日華仔正式復工，到北京出席電影《俠盜聯盟》宣傳。

分手
別離沒有對錯！唐詩詠與洪永城喺Ig宣在分手，傳周焯華（洗米華）愛將盧啟邦撬牆腳，唐詩詠爆喊否認：「我從來唔係一個貪錢嘅人。」崔建邦與林珊珊細女李怡（野人）亦喺社交網宣告分手；劉美君與混血男友結束8年情；賭王何鴻燊三太兒子何猷啟與以色列索模女友Angelika和平分手；而陳雅倫於2月宣布將閃嫁吳彥祖表哥Martin，惟唔夠一個月即閃分，數臭前度玩失蹤兼大話精，搞到她出現抑鬱瘦10磅。

離婚
唐寧與大自己13年嘅舞台劇才子老公鄧偉傑，敵不過七年之癢決定離婚，有傳導火線係唐寧秘交新歡；賭王二房千金何超鳳發聲明，透露去年同何志堅結束23年夫妻關係；黃心美與台灣籍老公Thomas終止異地婚姻，離婚後唔要一分一毫贍養費；陳煒驚爆同顏志行已離婚5年，前夫傳已有新歡台灣歌手鄭雙雙；90年代玉女歌手黎明詩不但認與銀行家老公Eric Fung離婚，更公開「出櫃」戀上同性蜜友Kelly。另陳逸璇與墨西哥籍老公、陳貝兒同黃國棟都難逃離婚厄運。

賤男
賤男何其多！鄭俊弘密冚有富貴未婚妻Beebs，暗撻何雁詩一腳踏兩船，最後被未婚妻踢爆劈腿致分手，惟鄭俊弘同何雁詩公開戀情冇耐已頻傳情變，年尾更涉虐狗風波；憑《九品芝麻官》「常威」上位的鄒兆龍，就被強國小三喺微博開帳戶「鄒兆龍出軌記錄」，上載鄒兆龍摸大髀相兼露骨語音對話，大鬧對方係渣男；而前《東張西望》主持李潤庭背老婆搭上情婦Tiffany，不但去年搞到離婚，今年更因一再「偷食」犯錯，結果飯碗都打爛埋，被無綫炒魷魚。

患癌
最緊要身體健康！67邵音音忽然自爆10幾歲開始患皮膚癌，頸部做過多次手術，佢依然樂觀面對：「人都要堅強生存，多一日算一日。57歲洪朝豐喺10月確診患舌癌，脷底近牙肉地方夾雜黃色嘅膿，講嘢、食嘢、飲嘢、吞口水、唱歌都痛，曾到南京接受中醫治療。

吳綺莉與卓林糾紛
冇仇不成母女！吳綺莉為成龍未婚生女，卓林今年18歲，相依為命嘅兩母女卻漸行漸遠！3月，吳綺莉因涉嫌刑事恐嚇被捕，卓林離家出走，吳綺莉喺翁靜晶陪同下開記招，哭求女兒回家；4月，卓林由泰國返港傳自殘身體入院；6月，卓林搬返家，兩母女和好如初。10月，卓林喺網上公告「出櫃」戀上30歲加拿大籍網紅Andi；11月，吳綺莉報警聲稱寓所失竊約17萬元財物。

關淑怡刑事恐嚇
今年3月16日，關淑怡喺入住嘅愉景灣酒店內，大力推酒店男職員胸口，事後被警方拘捕，被控以一項刑事恐嚇及一項普通襲擊罪，7月出庭時，總裁判官指考慮關淑怡有真誠悔意，並承認罪責，判罰款2,000元，寄語關淑怡向前看及快樂地生活下去。

無綫禁奶令
11月無綫忽然向旗下女藝員發出「禁奶令」，唔鼓勵節目同劇集賣弄身體、性感、強姦、情慾鏡頭出現，有指導火線係J2台節目《3日2夜》出事，因女藝員着性感泳衣太吸睛，為免影響打入大陸市場，董事局主席「殼王」陳國強親自落限奶令，有傳違令者即炒。不過，本　月無綫舉行台慶活動，「咪神」張秀文、前港姐冠軍邵珮詩、沈卓盈、姚子羚、湯洛雯、田蕊妮等全部「胸」群而出。

亞視復活
熄機20個月嘅亞視，已於12月18日喺手機APP有得睇，明年1月29日喺OTT平台復活，搵咗一班前無綫精英倒戈助陣，包括前製作總監吳雨擔任亞視行政總裁、曾醒明做亞視對外事務部總監、區偉林擔任亞視營運總裁、何麗全做亞視高級顧問。前總經理陳志雲主持全新《百萬富翁》，還有陶傑、曾華倩等都會喺亞視出現。

更多娛聞，喺晒《娛果》
http://fb.com/appledailyent