曾經係各間大學、大專嘅學生會聯合組織「學聯」（香港專上學生聯會），前日喺黃埔舉行60周年聚餐。學聯歷任成員唔少人係政、商、社運界骨幹人物，好似現任立法會議員區諾軒、葉建源、75年港大學生會會長麥海華、社民連前主席陶君行、中大政治與行政學系高級講師蔡子強、前議員民主黨李永達、前學聯秘書長周永康等，仲有「梁粉」前新聞統籌專員馮煒光等都有出席。

今次聚餐搞手係第35屆學聯秘書處常務秘書孔令瑜（Jackie）、同埋第54屆學聯秘書長陳倩瑩（Daisy）。Jackie話今年六四時Daisy提起，今年係學聯成立60周年，前秘書長周永康又打算以香港學運為主題出書，席間提起不如為此籌款，最後講講吓變搞聚餐，結果前晚一共筵開16圍，近200人出席，前日最年長嘅學聯老鬼遠至50、60年代都有出席。

馮煒光捉戴耀廷合照

李永達就喺fb貼出一張同學聯會長楊寶熙嘅合照，話楊係佢76年入港大聽到最多嘅名，而楊當時係國粹派大旗手，去到一個情況係佢認為係盲目支持共產黨。但楊呢十年內有好大反思，四年前仲積極參與雨傘運動。

而投咗共嘅馮煒光就係fb話：「今晚不談政治，只是懷舊！」仲上載同佔中發起人、港大法律學院副教授戴耀廷嘅合照，但區諾軒喺facebook寸爆馮煒光已變梁粉，又對學聯表達期望：「慶幸自己還和好多人，仍然冥頑不靈，走在在野改革路途上。還盼重整、合一、再興改革浪潮，能有機會於未來實現。」