關智斌（Kenny）同張致恆（Steven）今晚就去咗中環8號碼頭出席時尚雜誌活動，問到佢哋Boy’z開演唱會進展，Kenny就表示已密鑼緊鼓：「今日啱啱排完舞，同埋呢排練番把聲。」記者就問到佢哋到時會唔會跳舞，做番以前嘅側手翻，Steven就笑言：「側手翻絕對無問題，我一定得，側手翻係最簡單，所以到時淨係做側手翻。」Kenny就話自己乜都得：「雖然大家都老咗少少，但係都呢排用咗好多時間去練。」Steven就補充大家隔咗一段時間無唱歌，要練返多啲歌同做返一啲聲樂訓練，同搵排舞老師去學。

之前為咗宣傳演唱會，Steven就到訪Kenny家居，令到Kenny豪宅曝光，Kenny就否認自己係住豪宅：「同真正豪宅差好遠，其實o個地方好細，只不過我有品味，裝修得靚啲，就係咁樣，同埋唔係用咗好多錢裝修，用咗6位數字。」記者就笑言佢裝修時有冇參考張敬軒屋企攞靈感，佢就表示：「我哋唔同style，我睇過佢啲報道，佢嗰啲好宮廷好英倫感覺，我就好Modern。」Steven就搭嘴：「直情係cyber，乜嘢地方都見得人，咩角落都見過。」Kenny就直言冇諗過條片有咁大反應：「原意拍係希望宣傳下。托賴啦，啲飛賣晒啦。」

至於演唱會好多粉絲買唔到飛，同有黃牛，佢哋就呼籲大家唔好買黃牛，不過都加唔到場，Kenny話：「場地所限加唔到，希望盡量做好個晚表演，同埋個晚有校園主題，希望大家著吓校服。」

精選娛聞，喺晒《娛果》
http://fb.com/appledailyent