貌似章子怡嘅台灣模特兒李妍瑾，噚日有台灣報道指，佢擔任世界小姐萍鄉雙月灣賽區評委，喺用餐結束後，被工作人員不慎推擠，意外摔落山區，身體及臉部均撞傷，傳佢擔心毀容，緊急送醫，已清洗傷口，未知會唔會留疤。

李妍瑾向台灣媒體發傷勢相，指噚日因為天色昏暗，樓梯顛簸，同行工作人員不慎跌倒撞飛走在前頭嘅李妍瑾，佢被撞飛後翻滾咗2圈，好在工作人員第一時間捉實佢，否則李妍瑾會成個人跌落山坡，工作人員帶李妍瑾睇急症，照X光檢查腦部無大礙，不過佢身同面部都有多處擦傷，目前專心休養，暫停工作，為咗避免臉上留疤，仲要進行第二次清創手術，李妍瑾覺得心情沉重，「倒楣受傷，目前剛恢復的演藝事業又要停擺一陣子，幸好談妥的電影也剛好延期」。

李妍瑾16歲做廣告模特兒，2005年8月以選美佳麗姿態，入台灣演藝圈，2005年世界華裔美后奪亞軍、2005年世界網路小姐亞洲區冠軍、全球亞軍，2007年獲得國際妙齡小姐全球季軍。