51歲日本女星齊藤由貴被爆搭上同篤信摩門教嘅已婚醫生，結婚多年嘅齊藤由貴上月開記者會否認出軌，不過雜誌《Flash》上星期刊登兩人自拍咀嘴照嘅偷食證據後，呢位人夫醫生更接受電視台訪問，承認同齊藤由貴嘅婚外情長達五年，不過關係曝光後已經斬纜，搞到原本否認不倫戀嘅齊藤由貴都立即轉軚，噚日更發聲明公開道歉，但就話事務所正與警方對話，將會向爆料兩本雜誌採取法律行動。

齊藤由貴形象破產，佢指已有心理準備在工作上會接受處分，其代言兩份廣告合約正考慮將佢炒魷，屆時齊藤由貴定要賠上違約金，而佢今年5月起成為神奈川縣嘅手語推廣大使，因醜聞而導致呢項工作都被辭任。

醜聞中任職醫生嘅50多歲男事主，被今日出版嘅新一期《Flash》咬住唔放，再有一輯更激絕密照曝光，今次相中嘅姦夫竟然頭笠女人底褲拍照，似足漫畫及電影《變態超人》主角一樣，照片被指是在齊藤由貴寓所拍攝，後面放有齊藤嘅家庭照，相信照片係由齊藤由貴操刀。