近日韓國「新沙士」有升級的趨勢，韓國係香港人嘅旅遊熱點，加上香港03年經歷沙士肆虐，難免令人人心惶惶。

鄭嘉穎、陳嘉桓及丁子高等今晚喺中環出席Kiehl's慈善活動，丁子高直言唔想香港再有「沙士」，唔想過返以前嘅日子，佢話同囝囝Torreso依家唔會去多人嘅地方。

問到老婆楊千嬅之前病倒，但兩公婆依然參加內地真人騷，丁子高話:「其實當時去咗澳洲一個星期，都辛苦要周圍跑，隨團有醫療隊跟住，都有幫手治理，佢o依家身體冇任何病菌，但氣管未好返晒。」講到之前千嬅取消廣州演唱會，丁子高話:「佢係一個負責任歌手，冇理由只比30%功力表演。」有冇煲補品俾千嬅食?佢話:「O依家主要瞓覺，11點前就瞓，唔玩手機，月底又要出發外景，去好熱又好凍嘅地方。」

講到香港有「新沙士」懷疑個案，鄭嘉穎話:「大家要有警覺，自己唔會叫人洗手洗手洗手，希望大家要有意識戴口罩。」陳嘉桓就話自己有同韓國朋友Share情況，又講返以前香港沙士時嘅事，嗰陣佢仲係學生要返學。