特首董建華噚日主持拔萃男書院附屬小學嘅開幕禮,之後同幾個小三學生對話,大講足球、NBA。董伯伯讚班同學仔知好多嘢、好活潑,又讚佢哋讀書讀得好叻,呢班小朋友原來都好識送高帽,其中一個大聲回應話「你統治香港統得好啲」,真係拍爛手掌。
同學仔呢句話可以話係讚董生,如果「心邪」啲嚟睇,令人覺得係暗寸緊董生管得唔掂,唔怪得八方問咗幾位在場人士,都覺得嗰位小學生係叫董生要管好啲香港。
八方喺呢度要補充幾句,當時由於場地所限,本報記者冇得入現場,事後聽到嘅版本都唔同,八方最後都係睇番新聞處放上網經剪輯過嘅片段,若以官方版本,大家應該係互送高帽,小學生都識同老董客氣,真係後生可畏。