左報日日吹捧建制派、抹黑泛民，建制派立法會議員本應幫襯左報以示支持，但身體真係好誠實，八方從建制派議員喺立法會申報開支睇到，愛國愛黨嘅工聯會立法會議員辦事處，好唔畀面左報喎，《文匯報》、《大公報》、《商報》、《中國日報》一律唔訂(唔通免費派發？？？)，反而訂咗《蘋果日報》、《壹周刊》、《明報》、《東方日報》、《星島日報》同《東周刊》。

除咗工聯會，經民聯石禮謙亦一樣，左報一律唔幫襯，只係訂《蘋果日報》、《南華早報》等呢啲主流傳媒。保險界陳健波則只訂《南華早報》同《經濟日報》兩份。

言行最合一嘅要數金融界吳亮星，《文匯報》、《大公報》、《商報》統統訂齊，怪不得處事同中央思維最一致。