族長個膝頭都未好番晒，好似又要再爛過。話說佢陰咗唔少親友，包括我同佢老婆......所以係好大罪。

我哋支持嘅田泰安早兩日就魂遊太虛，一滴都無，都係相當咁罪過，我真係聽到好多朋友都嬲嬲豬。輕輕唞番吓，騎頭場五班1200米嗰隻「勁皇子」，話晒隻馬等交代等到變長頸鹿，唔該今次正常發揮。

畢竟已經講咗N咁多次，分好低，磅輕又撞啱有檔（1檔），仲要跟前守好位，唔為交代都應該有Q。

如果要買Q，我仲會預埋又笠番眼罩嘅「哈蝦王旺」，一千又好千二又好，落班就有得大蝦細，狀態一路都保持得幾好。有檔（4檔）唔怕後，應該就守中間位，均速返嚟。

「城中霸」係一隻評分夠低、前仗轉後追就走光嘅馬。早兩日嗰場又傻咗，擺前冇咗段後勁，當無跑過就算啦！匆匆又出，我估佢係當試閘再博呢場。

爭啲漏咗隻贏完都仲保持得唔差嘅「雷霆導彈」，拍落幾好力水，繼續有檔（2檔）又夠主動，唔怕贏馬要加嗰幾磅嘅。