獨立經營的馬鞍山戲院，同星影匯，如今全港只餘此兩家戲院播映《十年》。今日共放映9場，迄今累積票房逾580萬。

農曆新年將至，馬鞍山戲院於明天及後天仍放映《十年》，合共四場，分別為6:15pm、8:05pm、10:00pm及11:55pm。

同樣是獨立經營，但經多次易手、位於紅磡的寶石戲院，取態卻相當離奇。由2月6日至2月17日，都會播映王晶新片，一日五場。寶石戲院比較細，只設有一間影廳，平時只上映兩部戲，賀歲檔只放王晶新片，咁其他場次呢？都係播王晶新片。

其實唔少紅磡街坊同網民一直都好支持寶石戲院，因為其小本經營，且具地道特色同人情味。對於今次寶石只播王晶新片，網民反應頗大:咁其他賀歲片呢？《死侍》呢？

寶石戲院嘅fb小編回覆網民查詢，表示會上映《死侍》，但並非同各大院線同步於9號年初二上映，而係放喺二輪——2月18號上。

網民嘖嘖稱奇，亦有人深感失望:「你哋要好好考慮大家意見。上王晶唔使問實蝕。你提前上新戲(咩都好)我即刻買飛點話。」、「仲邊有人睇王晶呀，盞連電費都蝕埋呀」、「紅磡街坊，長期支持者，籲請寶石戲院改播《十年》，如果再播王晶以後都唔去。講到做到！」、「個導演太人渣，幾多宣傳都冇用，醒目嘅就快啲落畫啦，你哋重播五個小孩的校長可能仲多人睇。」、「咁多好戲唔播，播呢套爛片？叫人點幫襯你呀」

很肯定，有人又會跑出來說，政治同娛樂要分開!於是有網民分析:「叫你播《十年》事實上難啲0架啦，即係咁，人哋《Deadpool》年初二上，你遲咗上，蝕咗頭啖湯。Marvel迷其實好現實，邊度有得睇就會Dogrush捧場，你去到初十幾先上，老老實實，想有錢賺都難。我唔同你講政治，我同你講現實。信網民必得救。唔想蝕到門可羅雀咁樣的話，落賭城，上死侍，絕對可保貴院仝人富貴平安。新正頭想發個正財的話，不妨諗諗佢。」

一直身體力行支持小店嘅龐一鳴，亦於fb分享一點公關智慧:「紅磡寶石戲院作為非商場非連鎖戲院，選片應該可以和消費者有更多互動。這麼多觀眾和街坊不想看王晶，寶石戲院實在可以化危機為契機。不上王晶的戲是一個可能性，把某些場次開放出來讓公眾公投選片播放，更有可能成為一場公關和票房大勝的一著。寶石戲院不妨諗諗。」馬鞍山戲院每日播6場《十年》，已經贏咗。

但不可不知的是，經營超過四十年的寶石戲院經過多次易手，依家老闆係韓國公司CJ希傑集團。據行內消息指，該韓國集團係想累積院線經驗，然後北上，申請喺在大陸開院線。所以寶石戲院即使長期虧本，老闆都覺得冇所謂。行內人更笑稱，寶石放片嘅檔期，係你完全估佢唔到，不按牌理出牌。

咁如果一間香港地道舊戲院，變成韓國集團進軍大陸之路，會否太令人神傷。