歐寶TRIXX 實用概念車
蘋果日報 2004/04/02 08:00
■呢部歐寶雖然係概念車，但實用性高，真係希望廠商會投產滿足車迷。
以造型而言，這部概念車用上方便上落嘅趟門設計，以鮮黃色作為車身主要色調外，車長僅得3.04米，對行走一啲迂迴曲折嘅路面，絕對稱得上係強項，廠方又為其安排一台最新嘅1.3公升CDTIEcotec柴油引擎作骨幹，動力輸出甚為充裕（馬力70匹），加上僅為850kg嘅車重，難怪新車0至100km加速度僅為13.2秒，而極速更可高達170km/h咁快！
雖然TRIXX嘅車長僅過3米，但軸距卻有1.94米，加埋開啟幅度甚大嘅車門，除可為車上乘客營造出一個寬敞嘅車廂空間外，更能為乘客上落車及行李帶來不少方便。與此同時，車內座椅更可按不同需要作出收摺，以便擺放行李，車尾泵把中間部份又可抽出，用嚟載單車都得㗎！如果呢部車真係投產的話，相信會吸引到唔少年輕車迷！