練馬師霍利時延續上季嘅強勢，今季跑咗三次賽事，已有兩場頭馬見面。明晚（13日）谷戰繼續佈下重兵，「旅英駿爵」、「情趣」同「育馬妙星」都係當打分子，連場數糊真係唔出奇，第五場有一匹八歲老馬都要留意，就係「常妙星」。

現役N布馬（11/12年馬季進口）寥寥可數，「常妙星」年事已高，但喺第四、五班照樣能夠也文也武，服役六季贏出六場頭馬。

上季喺田草兩捷後，被霍利時喺暑假安排佢退役，轉型做拍跳馬，喺晨操幫手「教導」馬房一眾經驗尚淺嘅年幼馬，不過「常妙星」明晚又出賽，即係話暫時未有退意

今場騎「常妙星」嘅李寶利，上星期五（8日）操過匹馬一課，佢話老馬真係仲有兩腳，狀態保持得唔錯。

雖然「常妙星」歷季喺跑馬地窄場未贏過，連續10場三甲不入，但上季尾突然有驚喜，一連兩場喺1650米跑入季軍。明晚再跑同程，好多前輩成日話老年特別利季初，若然「常妙星」再次上名，甚至贏硬，真係一啲唔出奇。