當年今日
關於我們

【李八方online】「Call bar」call埋情人banner兼毛公仔 法官寫信投訴 大律師公會叫停

蘋果日報 2019/09/11 17:12

李八方ONLINE大律師公會潘兆初大律師認許儀式

想戴假髮、著律師袍喺法庭雄辯滔滔?當你讀完LLB考埋PCLL,仲要跟師傅、再向大律師公會申請認許取得大狀資格(行內一般叫call bar),先可以成為真正嘅大狀。不過,最近負責處理call bar嘅高院法官就唔多滿意一眾「準大狀」and friend子嘅行為,認為佢哋有失莊重,仲講明話其實「準大狀」嘅情史、長篇大論嘅致謝詞,既冇必要亦唔應該係call bar時陳述;仲有氣球、毛公仔、鮮花等就更唔應該帶入莊嚴嘅法庭內。所以,各位「準大狀」記得守吓規矩喇!
高等法院上訴庭法官潘兆初喺上個月28號以署理首席法官嘅身份,去信大律師公會主席戴啟思,希望公會可代為轉述有關事宜。封信開宗明義就話,有法官對於最近call bar期間見到嘅不當行為表達關注。法庭明白call bar對於「準大狀」同家人朋友而言係歡樂嘅事,更可以話係事業上一個重要嘅里程碑。之但係呢,call bar始終係正式嘅法庭程序吖嘛,唔應該當作係畢業典禮或者頒獎典禮,更提醒協助「準大狀」動議的「師傅」或者其他大狀,動議陳詞係唔應該超過5分鐘。
潘官又話,法庭雖然容許陳詞內容有一定程度嘅自主,但各位「師傅」應該好好拿捏,舉例指「準大狀」嘅情史或者愛侶等嘅內容,係完全不恰當,至於長篇大論嘅學歷證明同致謝詞更應可免則免。潘官話喎,法庭唔會禁止輕鬆幽默嘅陳詞,但內容必須得體、不減法庭嘅莊嚴,動議人更唔應該要求法庭容許「準大狀」自行發表演說。
除咗「師傅」和「準大狀」外,潘官更提醒出席call bar嘅人士需保持肅靜。法庭理解當聽到幽默嘅演說時或會有所反應,但強調絕不應喧嘩鼓掌;大人亦應確保同行嘅小朋友唔會作出任何干擾法庭程序嘅行為。除咗唔應該將氣球、鮮花等帶入法庭,潘官仲話唔應該係庭外或法院大樓外展示橫額。大律師公會主席戴啟思喺一個禮拜之後就匆匆去信各會員,叫大家注意上述事項。
聽講,除咗大律師公會收到潘官嘅信,原來潘官都寄咗封類似嘅信畀律師會會長彭韻僖。
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港
empty
曾有「準大狀」在儀式完畢後,在庭外拉banner慶祝。