毒品害人，影響一生。為緩減毒害，基督教靈實協會「和平之光」小組多年來致力推行「全人戒毒藥物復康服務」計劃，透過醫護人員、牧者及輔導員，從身、心、靈三方面協助病患者戒除毒癮，重投社會。蘋果日報慈善基金有見服務富意義，早前撥款資助該計劃未來兩年的經費。

「和平之光」成立於一九九七年，主要由靈實醫院的醫護人員、社工、院牧及輔導員組成，在醫院採取半禁閉形式，以三個星期的藥物、福音、職業及物理治療療程，幫助病患者脫離毒海。
阿良是其中一位服務使用者，他於三個月前接受「和平之光」戒毒服務，目前正在康復。「我吸毒好多年，戒毒好多次，但每次都失敗；今次好唔同，『和平之光』嘅醫生、護士、牧師，真係畀到我『愛』嘅感覺，佢哋無私嘅關懷，令我好感動，亦畀我清晰睇到應該走嘅路，所以我有信心今次會成功。」
「和平之光」成員之一，藥物復康護士李廷貴坦言：「其實要喺短時間內幫病人斷癮並唔困難，難係難在點樣令佢哋持守，唔再跌番落去，所以我哋着眼唔單止係身體上嘅醫治，重會藉着福音，幫佢哋重新建立正確嘅價值觀；另外，我哋亦有社工密切跟進每一個個案，同時有職業輔導，目的係幫助病人發掘自己嘅專長，建立投入社會嘅信心。」

「過來人」當輔導員
「全人戒毒藥物復康服務」計劃的另一特色，是找「過來人」擔任同輩輔導員及外展義工，增強說服力。四十九歲的曾昭平，十四、五歲便加入黑社會，其後更染上毒癖，浮沉毒海近十年，一直無法戒除毒癮，直至一九八一年，他因打鬥身受重傷，入住靈實醫院，透過當時的福音戒毒服務，成功戒毒，六年前更被靈實醫院聘請為「和平之光」同輩輔導員，服務至今。「我真係好感恩，亦從來冇諗過今日會坐喺呢個崗位幫人戒毒，𠵱家我嘅角色就好似紅綠燈，以過來人嘅經驗提醒病友，幾時係安全、幾時係危險，我嘅力量雖然有限，但希望救得一個得一個。」