蘇志威有份投資嘅西裝店Luxe Tuxedo開業數年，生意穩步一直上揚，最近更喺灣仔開設新分店，日前蘇老闆就喺灣仔接受「蘋果」訪問，講講西裝店今年嘅大計。

香港每年有唔少婚紗、婚禮嘅展覽，吸引唔少預備結婚嘅準新人入場，蘇老闆表示Luxe開業初期亦都有擺婚展：「婚展係一個宣傳嘅機會，但舖頭呢幾年比較忙，額外嘅人手去應付婚展，不過呢幾年生意唔錯，於是想回饋顧客。」3月9至11號蘇老闆仲話會親自落場，而且會提供唔少優惠俾大家。

除咗生意上軌道，蘇老闆亦同唔少企業和機構合作舉辦講座，分享男士禮服知識同禮儀，兼幫機構訂造制服，嚟緊仲有計劃進軍國內：「希望今年底前可以喺深圳或者廣州開舖，其實都計劃咗好耐，希望可以順利成事，長遠就梗係希望更多地方可以更多城市可以開舖啦。」

對西裝相當講究嘅蘇老闆話：「我覺得男士起碼要有一套度身訂造嘅西裝，我人生第一套西裝係喺17歲都未入行嘅時候，同蔡一智喺廟街街邊檔訂造， 我仲記得好似係灰色，雖然當時做嚟唔知有咩用，但總覺得男士係有咁嘅需要。」

最近蘇老闆旗下嘅馬「駿王」順利贏出頭馬，佢笑話全靠當日著住自己品牌嘅馬主系列西裝：「呢個系列係專屬馬主嘅，會為每位馬主度身訂造，以刺繡嘅方法將每隻馬出戰嘅彩布顏色同出生日期繡喺西裝上面。」仲透露有意再做馬主，目前正物色緊心水靚馬。

精選娛聞，喺晒《娛果》
http://fb.com/appledailyent