當年今日

窩輪搏擊:工行追落後買9600 - 俊樺

蘋果日報 2007/09/22 00:00


世界變得真係快,花旗股市啱啱炒減息刺激經濟,轉過頭又話炒通脹惡化,市場嘅混亂,人心嘅虛怯,睇到晒嘞。聯儲局議息前股市偏好,𠵱家應該係調整嘅時候,不過,話通脹會有急升風險,亦唔係得個噏字,睇吓美元同油價,話冇通脹風險你都唔信。
有人話唔使驚,因為花旗經濟冇以前咁好,通脹唔應該有壓力,如果係咁仲慘,即係話有「滯脹」風險,即係話經濟又唔掂,通脹又越嚟越厲害,你話到時點算?
前晚布殊喺記招答問題,講到經濟同樓市,冇厘神氣,伯南克同保爾森喺國會作證,面對尖銳問題亦表現得好冇癮,喺鏡頭面前都係第一次見,伯南克仲被迫到要承認減息係為咗救市,呢樣嘢對一個奉行自由市場嘅學者嚟講真係好hurt。
睇個勢如果花旗股市出現顯著調整,港股會有啲影響,不過,北水南調概念仲好煞食,恒指調整幅度唔會好大,短炒嘅話,集中火力喺H股應該既安全又有值博率。
工行C輪9600:工行(1398)係大落後股,等佢創新高炒上等到頸都長,昨日終於升上5.40元收市,炒乜嘢?唔使諗,梗係同抽個市上去有關,炒大落後先睇6元,要真正對恒指升幅有大貢獻,應該會踢上7元,可以買啲工行C輪9600,昨收77仙,槓桿率7倍(有效5.2倍),對冲值0.72,正股升上6.50元,9600應該喺1.70元樓上,正股跌穿5.15元止蝕。
empty