當年今日
關於我們

馮仁昭四圍超:吳家樂老婆早產誕孖仔騰雞 - 馮仁昭

蘋果日報 2008/01/11 00:00


吳家樂嘅老婆周蕙蕙噚日喺養和醫院生咗對孖仔,實在可喜可賀,噚日家樂仔接受無綫節目《東張西望》訪問,大談再為人父嘅心情。
empty
再為人父嘅家樂仔,接受無綫節目訪問時難掩興奮之情。 電視圖片
empty
噚日家樂仔老婆突然作動,入院接受手術,比預產期早咗少少。 電視圖片
想孖仔讀書叻
原來家樂仔噚日朝同個女玩緊嘅時候,太太突然話作動,於是打電話問過醫生之後,就即刻送佢入院做手術,由於作動時間比預產期早咗啲,所以令到家樂仔有啲雞手鴨腳,但好彩一切順順利利,孖仔各重5磅幾,不過暫時就冇相睇,事關𠵱家孖仔要瞓幾個鐘暖床。
問家樂仔會唔會考慮再要BB,佢就話屋企已經湊夠數可以打麻雀,暫時未有再追嘅打算。家樂仔其後接受本報電話訪問時話:「我對孖仔期望想佢哋將來讀好啲書,始終我自己唔係讀書材料,行行都出狀元,佢哋將來選擇做邊行都冇所謂,不過要同父母商量。」
其實家樂仔同周蕙蕙06年突然宣佈閃電結婚,兼且極速「造人」,囡囡𠵱家已經1歲大,估唔到舊年周蕙蕙又再有喜,仲係打孖上雙胞胎㖭,令到一直恨個仔繼後香燈嘅家樂仔鬼咁開心。