當年今日
關於我們

【再抱泯恩仇】千嬅唔敢直接搵Sammi 自爆被認錯係鄭秀文

蘋果日報 2015/01/28 06:00

蘋果演唱會許志安sammi千嬅即時杜德偉嘉賓丁太好邪呀高太

頭先講過,千嬅初出道時,被指與Sammi鄭秀文個look好似,引來不少風雨。噚晚千嬅請來Sammi做其個唱嘉賓,亦趁呢個機會,同Sammi打開天窗說亮話:「我好幸福,每個新人出道都需要話題亮點,我好幸運有個咁好嘅亮點喺工作上出現!」Sammi即問:「我邊樣嘢係亮點?」千嬅就話:「我似到一個咁堅、咁威、咁靚嘅人,仲唔係亮點,係咩?」相信大家聽到千嬅咁講,都會同Sammi一樣反應:「嘩,我頂帽好高呀!」

今次千嬅邀Sammi任嘉賓,過程轉折,佢係托經理人林珊珊問Sammi經理人郭啟華,而唔係直接搵Sammi,唔通……?Sammi自己都覺奇怪,千嬅就解釋謂,驚Sammi啱啱做完個騷,要休息下,未必可以出席,仲好直接咁話:「如果自己直接講,冇得退吖嘛!算你推,我都舒服啲!」Sammi笑道:「我點會推呢?」

講番頭先「人有相似」呢個問題,Sammi笑謂:「其實你仔都生埋啦,咁都仲認錯我哋?唔係你同我嘅問題,係佢哋嘅問題!」千嬅即自爆曾經喺內地開工嗰陣,俾人認錯係Sammi,佢仲好鬼傳神咁,用國語「重演」當日情景,對方同佢講:「『我好喜歡你跟華仔拍的幾部戲!』」Sammi即問:「咁你點答?」千嬅話:「我認咗呀,我話『些些』!我怕解釋仲核突,因為我國語唔係咁堅,解釋錯咗又死,不過對方都抱有懷疑眼神咁走開。」

聽完千嬅呢個奇遇,Sammi就話:「哈,我sofar咁耐出街冇被嗌錯做『丁太』!」千嬅好奇地問:「咁都錯?唔會啩?」Sammi即借機送頂高帽俾許志安:「你當我隔籬嗰個流嘅咩?」全場爆笑。唔係喎,許志安都曾經俾網民認錯係杜德偉喎……

估唔到千嬅嘅奇遇,一浪接一浪,身為丁太,但竟然俾人嗌錯咗係「高太」,佢爆笑道:「我唔知點解我老公變咗姓『高』,成日都係咁,我之前冇結過婚,冇重婚,我老公姓『丁』0架!呢件事好邪!」曾幾何時,Sammi嘅口頭蟬都係「好邪呀!」

搞笑一輪後,Sammi離開舞台前,再次認真地為千嬅打氣,佢話:「我今日好開心,希望大家繼續支持千嬅,睇到佢好畀心機!」千嬅笑謂:「做完真係要抖抖,好攰!」Sammi衝口而出爆咗句:「係好Q攰!」嘩……